РУСКИ КЕРЕСТУР – Двацец штварта Културна манифестация „Костельникова єшень” (КЄ) почина на ютре, 10. новембра у Руским Керестуре, а акцент тогорочней програми манифестациї будзе на промоциї нових кнїжкох на руским язику и стретнуцох з писателями, як и музично-литературни вечари.
У рускокерестурскей Основней школи „Петро Кузмяк”, програма почнє на 11,30 годзин, зоз стретнуцом з писателями, а нащивительом буду представени и даєдни кнїжки.
Централна програма тогорочней КЄ будзе отримана у Ресторану „Червена ружа” на 18,30 на хторей, окрем промоциї нових кнїжкох по руски, свою творчосц представи писатель Мирослав Алексич, а окреме святочну ноту цалому вечару додаю композициї Ивана Ковача, хтори буду виведзени у литературно-музичней часци програми. Иншак, тогорочна Културна манифестация будзе отримана у знаку 80-рочнїци народзеня нашого композитора Ивана Ковача.