БЕОҐРАД – По звиту директорки Републичного фонду за пензийне и инвалидске осиґуранє (ПИО) Драґани Калинович, цалосни приходи и приманя того фонду прешлого року були 583,36 милиярди динари, цо 97,67 одсто пенєжу планованого за тот рок, а 1,64 одсто, односно 9,42 милиярди вецей як 2015. року.
Буджетни дефицит од 1,2 милиярди у прешлим року надополнєни з нєрозпоредзеним звишком приходох и приманьох з прешлих рокох, та цалосни резултат дїлованя Фонду ПИО на нули. Чолнїки Фонду наглашели же до того року пренєшени 3,21 милиярди нєпотрошени средства и нєрозпоредзени звишок приходох и приманьох з прешлих рокох.
На схадзки Управного одбору Фонду бешедоване и о демоґрафских рушаньох у Сербиї у контексту системи пензийного и инвалидского осиґураня. Наведзене же одношенє числа пензионерох и осиґуранїкох (занятих) остатнї три роки 1:1,4, а и кед би шицки роботно способни жителє Сербиї вошли до системи осиґураня, максимални можлїви однос пензионерох и осиґуранїкох би бул 1:2,2.
Демоґрафска ситуация и тренди у Сербиї онєможлївюю посцигованє оптималного одношеня числа хасновательох пензийох и осиґуранїкох од 1:3, цо би обезпечело абсолутну финансийну стабилносц пензийней системи.
Заключене же ше пензийна система нє може отримац без националней стратеґиї хтора обезпечи економску и демоґрафску проґресию, а першенствено звекшанє занятосци