РУСКИ КЕРЕСТУР – Прешлей нєдзелї, 3. юния, ФК „Русин” госцовал у Липару дзе процив домашнєй екипи з истим меном страцел змаганє зоз 5:2 (0:1). Ґоли за Русин посцигли Дюканович и Стефан Кочиш.
„Русин” одлично започал змаганє, и после першого ґолу препущел даскельо нагоди у першим полчаше. Добре започал и други полчас и посцигнути и други ґол, алє после оправданого пеналу за домашнїх, о пейц минути „Русин” достал ище два ґоли и то розбило його бависко.
„Русин” наступел у составе: Надь, А. Кочиш, М. Янїч, Й. Гарди, Голик, Малацко, Б. Орос, Саянкович, Дюканович, Будински и С. Кочиш. До бависка ище вошли Филип Рац хтори заменєл Будинския, Б. Янїч заменєл А. Кочиша, а Денис Гарди заменєл Б. Орос.
Змаганє процив Липара, було остатнє у тим першенстве. „Русин” завжал 13. место на таблїчки од 16 екипох Подручней фодбалскей лиґи Зомбор – Бачка Паланка. За шлїдуюцу сезону планує ше реорґанизация лиґи хтора будзе чишлїц 14 клуби.
Фодбалере „Русина” на пияток, 8. юния, путую до Словацкей дзе им буду домашнї фодбалере зоз Земплинских Теплицох.