НОВИ САД – З нагоди реализациї заєднїцких инвестицийох – вибудови Народного театру у Суботици и будинку Радио-телевизиї Войводини, предсидатель Покраїнскей влади Иґор Мирович ше вчера у Новим Садзе стретнул з министром култури и информованя у Влади Сербиї Владаном Вукосавлєвичом.
Мирович и Вукосавлєвич подписали контракт о преношеню средствох з републичного до покраїнского буджету за финансованє седмей фази проєкту Народного театру у Суботици, а слово о 111 милиони динарох. З тима средствами, за предлужованє роботох на Народним театру у Суботици з покраїїнского буджету буду видвоєни 223 милиони динари.
Мирович и Вукосавлєвич нащивели и будовалїще будинку Радио-телевизиї Войводини, дзе предсидатель Покраїнскей влади виявел же уж познати виводзач роботох за будованє нового будинку.
– Вецей як тисяч заняти у РТВ буду мац найлєпши условия за роботу, а окреме важни сеґмент то меншински редакциї, хтори буду мац простор же би у моцнєйшим профилу информовали на язикох меншинох, а вообще, РТВ достанє простор и за креативнєйши и рижнороднєйши змисти.
Мирович наглашел же шицки роботи на вибудову нового будинку РТВ, цо заєднїцки финансую Влада Републики Сербиї и Покраїнска влада, иду рационално и у рамикох запланованого, а Вукосавлєвич надпомнул же того року Република и Покраїна зоз 400 милиони динари вєдно финансує розчисцованє остаткох руйнованого будинку РТВ. Нови будинок РТВ Войводини би мал буц закончени за два роки.
