Нови контракти за безповратни средства до польопривреди

автор ртв /мар, фото ртв
877 Опатрене

НОВИ САД – Покраїнски секретарият за польопривреду, водопривреду и лєсарство тих дньох додзелєл нови контракти за безповратни средства по Конкурсох за опреманє статкарских фармох, вибудов пластенїкох и опреманє хладзальньох и сушарох. Цалосна вредносц додзелєних субвенцийох 32 милиони и 500 тисячи динари.

– Безповратни средства за опреманє статкарских фармох достали 13 реґистровани польопривредни ґаздовства, цалосна вредносц тих инвестицийох 11 милиони динари, з чого учасц Покраїни 5,5 милиони динари – гварел помоцнїк покраїнского секретара за польопривреду, водопривреду и лєсарство Младен Петкович.

З буджетом за 2017. рок за субвенционованє статкарских фармох були опредзелєни 50 милиони динари, а з ребалансом истого обезпечени дополнююци 35 милиони динари.

За софинансованє купованя опреми за рошлїнску продукцию у завартиим просторе – пластенїкох, уручени нови 27 контракти.

– Цалосна вредносц инвестицийох за продукцию у пластенїкох 15 милиони динари, з чого учасц Покраїни 10 милиони динари. По реализациї тих инвестицийох буду закрити нови 32 718 квадратни метери пластенїкох – наведол  Петкович, та дополнєл же з тей катеґориї 19 контракти подписани з младшима  д 40 роки, женами и тима цо робя у очежаних условийох, та здобули право на субвенционованє 70 одсто цалосней инвстициї без ПДВ.

Подписани и дзевец контракти за опреманє сушарох и хладзальньох цалосней вредносци 38 милиони динари, з котрих Покраїна субвенционовала 17 милиони динари. З буджетом за 2017. рок потераз видзелєни 135 милиони динари, а з ребалансом обезпечени нови 10 милиони.

ПОВЯЗАНИ ТЕКСТИ