ЖАБЕЛЬ/ДЮРДЬОВ – На двацец першей схадзки Скупштини општини Жабель, пондзелок 19. фебруара, принєшени вецей одлуки, а медзи нїма и Одлука о менованю нового составу Совита за медзинационални одношеня Општини Жабель и за його предсидателя вибрани Мирослав Чакан зоз Дюрдьова.
Совит за медзинационални одношеня ма шейсц члени, од хторих тройо представяю Сербох як векшински народ и по єдного представнїка маю Руснаци, Мадяре и Роми.
На схадзки за заменїка предсидателя Совита вибрани заменїк предсидателя Општини Жабель Момир Мандич зоз Чуроґу, як представнїк локалней самоуправи.
До Совиту, як представнїки векшинского сербского народу вибрани и членїца Општинскей ради задлужена за културу Нерима Шовлянски зоз Дюрдьова, спред локалней самоуправи и Милан Мутавчич зоз Жаблю. Боґдан Радул зоз Чурогу у Совиту представя Ромох, а Ґал Дюла зоз Жабалю Мадярох.
На схадзки СО Жабель принєшена и Одлука о менованю нових членох до Општинского штабу за позарядово ситуациї, прилапени Звит о його роботи за прешли рок и План роботи за тот рок.
На схадзки вигласана и Одлука о вименкох и допольнєньой Одлуки о усоглашованю роботи Яного комуналного подприємства (ЯКП) „Чистота” зоз Законом о явних подприємствох. „Чистота” ма превжац дїлносц ЯКП „Услуги и отримованє”, котре у процесу гашеня.