БЕОҐРАД – На схадзки Влада Сербиї видвоєла дополнююци 100 милиони динари за нови 20 000 ваучери за одпочивок у Сербиї, гварел за Танюґ министер тарґовини, туризму и телекомуникацийох Расим Ляїч.
Акция предлужена до 15. октобра, понеже до 15. авґуста буду роздзелєни дотерашнї ваучери. Потераз роздзелєни 73 000 ваучери, а найвецей туристох найщивюю Пролом баню, Луковску, Баню Ковилячу и Соко баню.
– Же бизме прицагли цо вецей туристох з иножемства, Сербия муши звекшац економски стандард и злєпшац туристичне понуканє у купельох.
Найвецей вимоги за ваучери поднєсли пензионере, 61 одсто, а коло 30 одсто заняти чийо приманя менши од 60 000 динари, 7,9 одсто нєзаняти, а 71 прияву поднєсли польопривреднїки.
Ваучери мож хасновац у 629 погосцительних обєктох котри обявени на лїстини на сайту Министерства.
У 2016. року 46 000 гражданє вихасновали ваучери за пребуванє у даєдним з туристичних местох Сербиї, и на тот способ витворени 400 000 ноцованя.