НОВИ САД – Нєшка, 22. децембра, у голу Покраїнскей влади АП Войводини отримани традицийни Новорочни приєм за войводянских новинарох.
Представнїкох „седмей сили” перше привитал покраїнски секретар за културу, явне информованє и одношеня зоз вирскима заєднїцами проф. Мирослав Штаткич и здогаднул на резултати Секретарияту хтори витворени у 2017. року, насампредз Музей присоєдинєня, як и числени проєкти у подобовей, музичней, филмскей творчосци и видавательней дїялносци.
– Того року достати и перши европски проєкт у култури „Драги вина” од Фрушкей Гори по Мадярску. Тиж потримани шицки стандарди у информованю националних меншинох, а и нарок информованє будзе мац финансийну потримовку того Секретарияту. З вирскима заєднїцами тиж витворени добри резултати, а у шлїдуюцим периодзе тота обласц будзе у фокусу Секретарияту и Влади – визначел проф. Штаткич.
Предсидатель Покраїнскей влади Иґор Мирович привитал новинарох зоз словами:
– Наша заєднїцка мисия хтора була пред нами – будзе тирвац и после нас. Повязана є зоз єдну заєднїцку нїтку хтора ше уткала до Войводини. Будземе мац ище вецей роботи, наздавам ше же ришиме и проблем „Дневнику” и будинку Радио телевизия Войводини. Вшелїяк же отримаме принцип помаганя и финансованя медийох на териториї АПВ – потвердзел предсидатель Мирович.
И проф. Штаткич и предсидатель Мирович шицким присутним пожадали успишни и ище лєпши нови 2018. рок.
