Маюци у оглядзе звит о роботи у 2016. року и констатацию в. д. директорки Театра, та и самого Управного одбору же финансийна ситуация у предходним року була найчежша од снованя по тераз, як и песимистични нагадованя же годна буц ище чежша и у значней мири чежко предвидзуюца, нє лєгко одредзиц параметри на основи хторих би могло направиц кельо-тельо реални, а ище менєй оптимални план роботи за наступни штирирочни период роботи єдиней установи зоз формалним професийним (чи полупрофесийним) статусом у обласци театралней уметносци у нашей, рускей заєднїци. Формални план и список длугорочних намаганьох и инициятивох (у хторих сом свойочасово и сам бул уключени у велькей мири) би у такей ситуациї баржей здабал на список нєреалних жаданьох и, у тей хвильки, и попри задовольованя форми могол би буц лєм контрапродуктивни.
У тей хвильки обставини вимагаю цо можлїве прецизнєйше, реалне спатранє стану и рамикох дїлованя у реално постояцих околносцох у будучносци. То у старту подрозумює припознаванє факту же напевно Руснаци на тих просторох нїґда нє буду мац прави професийни театер хтори подрозумює и окремни обєкт зоз шицкима технїчнима капацитетами, стаємно заняту роботну заєднїцу и стаємно заняти ґлумецки ансамбл (од снох напевно нїґда нє треба одустац, алє нє мож у нїх жиц каждодньово). Циль хтори можебуц ище вше реално доступни, лєбо би требал буц визия ґу хторей ше муши чежиц, то театер зоз нєвельку, алє функционалну роботну заєднїцу, у хторей би були интеґровани управяцко-уметнїцки и технїчни кадри, хтори би реализовал представи зоз ґлумецким ансамблом, по проєкту на гонорарней основи, так як то уж вецейрочна пракса, алє у вельо лєпших материялних условийох. То визия, лєбо циль хтори би могол буц витворлїви у хвильки кед ше статус нашого театра (насампредз у финансийним, технїчним и кадровим змислу) враци голєм на стартну основу, oдносно на позицию яку мал у чаше його снованя. Кед би ше тота позиция досцигла у чаше штиророчного наступного периоду, то би ше могло раховац як успих, з оглядом на шицки околносци у яких тераз наш Театер дїйствує.
У тим периодзе (2017–2021) насампредз би требало ришовац шлїдуюци стратеґийни задатки:
1) Направиц свойофайтови инвентар постояцого стану и зачувац театер од можлївого осипованя технїчних, кадрових и креативних потенциялох хтори його состойна часц. Односно, пописац постояци фундус костимох и реквизитох. Пописац технїчни средства за роботу (рефлектори, миксети, рахункари, функционални часци сценоґрафиї, алати за роботу технїки…) и направиц план приоритетних потребох у тей обласци. Направиц список у тей хвильки активних, дакеди активних и потенциялно активних членох театра у творчим и технїчним змислу и увесц праксу їх зазберованя и стретаня у просторийох Театра пре можлїви идеї и инициятиви, алє и пре чувство припадносци и идентификациї зоз тоту Установу.
Рок реализациї 2017:
2) Очувац и предлужиц добру репертоарну политику яка запровадзена остатнїх рокох (з окремну увагу на домашнїх авторох) и досцигнути квалитативни уровень представох. Предлужиц постояци способи стимулациї домашнїх авторох драмских текстох, алє и запровадзиц интензивни контакти з писателями хтори ше нє випробовали у тей обласци, а маю дїла хтори потенциялно интересантни за наш театер. Понукнуц им помоц у тей роботи. Нє занєдзбац анї шветови репертоар. Пробовац черпац и готови тексти и теми за тексти зоз „старого краю”, односно державох дзе жию Руснаци. Помогнуц шицким младим особом хтори опредзелєни за студиранє, лєбо усовершованє у обласци театралней уметносци (ґлума, режия, драматурґия, применєни уметносци…). Источашнє глєдац ришеня еґзистенциялних питаньох школованих кадрох хтори уж маме.
Рок реализациї 2017–2021:
3) Чувац, пестовац и звекшовац число реципиєнтох, односно конзументох тей файти уметносци (публика у узшим и ширшим змислу. Направиц веб-сайт Театра. Госцовац у цо вецей местох дзе жию Руснаци, дзе за тото постоя елементарни условия за виводзенє представох. Пробовац участвовац, лєбо госцовац на голєм даскелїх фестивалох, лєбо смотрох театралней творчосци у Войводини, односно Сербиї. Найменєй раз рочнє госцовац у иножемстве (приоритет жеми у хторих жию Руснаци, алє пробовац контактовац и значни фестивали театралней уметносци у других жемох). Шицки представи, кед ше зоз тим зложа авторе, знїмац за РТВ и на таки способ презентовац ширшей публики.
Рок реализациї 2017–2021:
4) Намагац ше обезпечиц векши и стабилнєйши жридла финансованя и дефинитивно ришиц питанє статуса, односно снователя Театра. Преберац континуовани активносци и контакти на шицких уровньох власци (Општина, Покраїна, Република) у прешвечованю же потребна, односно нєобходна, вельо значнєйша потримовка тих хтори одлучую о финансованю тей файти уметносци, при чим ше помоц Заводу за културу войводянских Руснацох и Националного совиту, та аж и поєдинєчно позиционованих поєдинцох з нашей заєднїци у структурох власци абсолутно подрозумює.
Випитац потреби, предусловия и реални можлївосци за потенциялне апликованє за проєкти зоз предприступних фондох ЕУ. Гоч кельо то у тей хвильки звучи нєреално, пробовац врациц институциї спонзорства и донаторства за наш Театер.
З оглядом на реалну констелацию моцох, тренди яки уж обачлїви и можлївосц реалного вплїву, по питаню статуса пробавоц вилобирац єдну од шлїдуюцих двох можлївосцох – же би Општина Кула превжала часц сновательних правох (вєдно зоз Националним совитом Руснацох) у часци у хторей ше финансую материялни трошки и евентуално презентация театра у ширшей дружтвеней заєднїци. У тим случаю би театер затримал статус самостойного правней особи, односно установи, з тим же би ше, як и потераз, у значней мири операл на технїчни и други капацитети Дома култури у Руским Керестуре. Тиж так, же би ше окончела интеґрация РНТ „Дядя” и Дома култури у Руским Керестуре до єдней установи култури Руснацох, чий снователь би у подполносци була Општина Кула, лєбо вєдно з Националним совитом Руснацох (напр. „Руски национални театер”), у хторей би були обєдинєни шицки сеґменти култури Руснацох хтори потераз пестовани у обидвох установох (оркестер, хор, фолклор, шпивацки ґрупи, рецитаторе, драма). У тим случаю би ше мушело добре и прецизно виплановац кадрову, односно управяцко-технїчну и уметнїцку структуру Установи.
*Скрацена и адаптована „Програма роботи и розвою РНТ „Петро Ризнич Дядя” (2017–2021)”