У прешлих штирох числох редакция и дописователє „Руского слова” писали о самоотримованю рижних нєвладових орґанизацийох у Руским Керестуре и општинох дзе жию Руснаци. Циль бул випитац кельо орґанизациї, котри медзи иншим робя и на розвою рускей култури, доставю средства зоз держави и фондацийох, а кельо ше можу сами отримац зоз членарини, донацийох и рижних спонзорствох.
Резултат указал же ше найменєй орґанизациї можу отримац зоз наплацованя членарини, алє же ше даєдним дружтвом з членства удало назберац голєм за канцеларийни трошки.
Найчастейше, гоч и нє вельки средства, дружтва котри пестую руску културу доставаю од Националного совиту Руснацох, односно од Заводу за културу войводянских Руснацох. Конкурує ше и достава пенєж за дїялносц од општинох, Покраїни и Републики. Значи, шицко начишлєне – од держави.
Спонзорства пенєжного нєт вельо, алє особного укладаня з боку членства – ище як. Активисти културних дружтвох вельо себе даваю, з дому приноша, райбу, сипу гориво за превозки и косачки.
Векшина дружтвох конкурує за средства прейґ проєктох, алє то нєсиґурни средства и вше менєй єст оптимизму же з ентузиязму годни длугорочно функционовац.
Єст дакус потримовки орґанизацийом зоз державох ЕУ и наявює ше финансийна помоц рускей култури зоз України.
Чувствує ше же при Руснацох нєвладово орґанизациї часто свойофайтова замена за державни установи и институциї култури котри им хибя же би очували национални идентитет. Други национални меншини у Войводни зоз своїх матичних жемох доставаю векшу материялну помоц, алє и институцийну потримовку.
Руснаци политично подзелєни коло питаня матичней жеми. Алє и кед би були зложни – знова би чежко ишло. Україна у дияспори найвецей помага проєктом култури на українским язику. А прецо би порцийни обвезнїки Мадярскей, Словацкей, Польскей, або Румуниї потримовали руску културу и бачванско-сримски язик, кед уж потримую свой державни.
Велька надїя би могла буц на фонди директно зоз Европскей униї, алє руска заєднїца у Сербиї за нїх ище нє так добре порихтана.