Кристина и Лидия Горняк, двойнята зоз Дюрдьова, штварта класа у стреднєй Медицинскей школи „7. aприл” у Новим Садзе, дзе ше порядно уча за педиятрийску шестру, а позарядово за медицинску шестру на общим напряме. Обидва одмалючка активни у велїх секцийох у Културно-уметнїцким дружтве „Тарас Шевченко” у Дюрдьове, занїмаю ше и зоз спортом, маю рижни гобиї, алє коло шицкого того, маю и шлєбодного часу.

У основней школи ходзели до руского оддзелєня, и на концу осмей класи обидва шестри були школярки ґенерациї. Гоч су наисце активни и маю вельо обовязки, школу нє занєдзбую, за ню и за ученє вше маю часу. Єдна другей у шицким помагаю, та аж маю и подобни оцени.

У котрих секцийох сце активни?

Кристина Горняк: Активни зме у фолклорней секциї у виводзацкей ґрупи, члени зме дзивоцкей шпивацкей ґрупи и граєме у оркестру бас прим тамбури.

Лидия Горняк: …А окрем у тих секцийох у КУД-у, активни зме члени и у церковним хору „Розанов” у Дюрдьове.

Прецо любице ходзиц до КУД-у?

КГ: Найволїме ходзиц до КУД-у пре нашо дружтво, а нормално, и прето же то любиме. Там нам шицки товаришки и товарише и то нам ище єдна нагода же бизме ше зиходзели и дружели. Гоч дакеди и страцим мотивацию, вше ше на нїх здогаднєм, и дзечнє пойдзем танцовац, грац, або з нїма шпивац.

ЛГ: Пре друженє и пре нашо заєднїцки путованя и турнеї по рижних местох, державох. Любим тото чувство кед напарто робиме у КУД-у, алє знаме прецо, награда нам вше будзе даяке путованє дзе пойдземе указац людзом тото цо зме през цали рок научели, алє пойдземе ше и дружиц и упознавац других людзох, цо ше ми барз пачи.

Кристина и Лидия

На котру секцию найволїце ходзиц?

КГ: Любим ходзиц на шицки секциї. Наприклад, у оркестру любим грац, бо ме то опущує и швидко ми прейдзе час, на фолклор пре дружтво, алє на шицки секциї вше дзечнє ходзим.

ЛГ: Я найволїм ходзиц на фолклор пре дружтво и тоти нашо путованя, алє и друженя у Матки после каждей проби.

З оглядом на тото же сце двойнята, чи одмалючка шицко вше робице вєдно?

КГ: Так. Кед сом нє зоз шестру, вше мам чувство же ми хиби друга половка, нєт тей енерґиї кед зме нє вєдно.

ЛГ: Ходзиме на шицки секциї вєдно, робиме вше шицко вєдно, аж и у школи шедзиме вєдно у лавки.

На котри факултети ше плануєце уписац после законченей стреднєй школи?

КГ: Плануєме ше уписац на Медицински факултет у Новим Садзе, на общу медицину. То нас интересує и од септембра ше починаме пририхтовац за тот факултет и наздаваме ше же нам ше поспиши.

ЛГ: Шестра ище роздумує, алє я сиґурно видзем и на примаци испит и за Воєномедицинску академию, кед же примаци нє буду исти дзень.

Попри у култури, активни сце и у спорту. Цо тераз тренираце?

КГ: Тренирали зме одбойку дас штири роки у єдним клубу у Дюрдьове, алє пре даяки причини, тераз зме на паузи, алє вшелїяк же плануєме предлужиц тренирац.

ЛГ: Ходзиме и на фитнес, а кед маме часу, пойдземе и до терховнї.

Як сцигуєце буц таки активни и успишни?

КГ: Думам же ключ шицкого добра орґанизация и добра воля. Случи ше дараз же ми ше уж нїч нє сце, алє понеже зме одмалючка научели буц таки активни и полни з обовязками, вше себе повем, кед сом могла теди, можем и тераз, и нє жадам скруциц зоз тей драги.

ЛГ: Попри добрей орґанизациї и волї, муши буц присутна и любов ґу шицкому тому цо робиме, бо кед бизме то нє любели, вшелїяк же бизме анї нє ходзели на шицки тоти активносци, и до школи до котрей тераз ходзиме, и вец бизме анї нє були таки успишни.

Маце ище даяки гобиї?

КГ: Кед мам шлєбодного часу, любим слухац музику, читац кнїжки и писац писнї, котри ище вше нє давам тельо до явносци же би ше их читало, алє лєм найблїзшим.

ЛГ: Шицко углавним исто любиме робиц, лєм же вона пише писнї, а я рисуєм. То ми досц добре идзе и кед ми шестра дакеди смутна, вше ю любим орозположиц зоз даяким моїм рисунком, як и вона мнє зоз писню. Барз любим правиц колачи у шлєбодним чаше, алє и иншак шицки роботи у кухнї дзечнє робим, док шестра волї пораїц.

Попри шицких обовязкох, маце часу дружиц ше и виходзиц?

КГ: Маме часу, вше го себе даяк направиме. Понеже ше рушаме по истих штредкох, углавним маме исте дружтво, та ше вец вєдно и дружиме.

ЛГ: Маме часу аж и за малини. У нашей загради нам оцец посадзел малини, та их тераз вєдно пестуєме, обераме и предаваме.

Чи сце єдна другей у шицким потримовка?

КЛ: Вше. Любим тото же зоз свою шестру мам цалком щире одношенє. Можем єй шицко повесц, а исто так и вона мнє. Вше ма мою потримовку, як и я єй. Єдна другей и помагаме же бизме нє скруцели зоз тей правей драги по котрей уж роками успишно крачаме.

ЛГ: Єдина особа котра зна шицко о мнє и ґу котрей нє мам нїяки тайни то моя шестра Кристина. Потримуєме єдна другу у шицким, алє и кед дацо нє добре у питаню, повеме то єдна другей. Найлєпши совит достанєм од нєй, та прето вше любиме и єдна другу посовитовац.

Цо бисце препоручели нашим читачом, як буц активни у вецей обласцох и ускладзиц шицки обовязки?

КГ: Думам же то шицко идзе спонтано на даяки способ. Перше треба випробовац шицко, и вец увидзиш у чим ши добри и цо це наисце интересує. И нормално, вше ше муши мац даяки циль. У нєшкайшим чаше, думам же барз добре препровадзовац свой шлєбодни час на даяким месце дзе ше мож и културно образовац, дзе особа на даяки способ будує свою особносц. То места дзе ше вше прилапює людзох.

ЛГ: Любов и добра орґанизация вельо помагаю буц активни у велїх обласцох и добре их усоглашиц. И муши ше мац даяку мотивацию за шицко тото. Я роздумуєм и так, же кед єдного дня будзем мац свойо дзеци, любела бим им погуториц о шицких своїх дожицох и успихох зоз младосци, зоз найкрасшей часци живота.

Кристина и Лидия у основней школи ходзели на змаганя зоз рижних предметох. Каждого року освоєли єдно од перших трох местох, а успихи котри визначели то же Кристина у осмей класи освоєла перше место на Републичним змаганю зоз сербского як нємацеринского язика и треце место, тиж так на Републичним змаганю, зоз руского язика. Лидия у осмей класи освоєла перше место на Кросу РТС-а, друге место на Републичним змаганю зоз сербского як нємацеринского язика, и друге место зоз руского язика на Медзиокружним змаганю. Двойнята, Кристина и Лидия предлужели зазначовац успихи и у стреднєй школи. Обидва були на змаганю зоз здравственого допатраня, дзе ше Кристина пласовала на Републичне змаганє зоз тимом, а поєдинєчно мала максимум боди и освоєла перше место.