РУСКИ КЕРЕСТУР – У рускокерестурскей парохиї св. оца Миколая нєшка Вельки пияток зоз хторим вирни означую здогадованє на дзень страданя и розпинаня на криж Исуса Христа.
У катедралним храме нєшка на 8 годзин богослуженє Читанє 12 страсних євангелийох праве о тих подїйох, а пополадню на 15 годзин Вечурня зоз покладаньом плащанїци до гробу, такволане Хованє Исуса Христа, а будзе го предводзиц преосвящени владика Георгий зоз домашнїма священїками. То єдини дзень у року кед ше дзвони нє оглашую, єдино ше под час Хованя оглашує „керепкадло”.
Вирни после Хованя до позних годзинох можу присц до церкви поциловац плащанїцу и помодлїц ше при Христовому гробу, як и цали дзень през Вельку соботу.
На Вельки пияток строги пост у єдзеню, того дня ше нє роби чежки роботи, алє ше го препровадзує у цихосци и молитви, а ґаздинї по обичаю фарбя писанки.