РУСКИ КЕРЕСТУР – Нєшка у просторийох Месней заєднїци у Руским Керестуре, на 11 годзин будзе отримана порядна Рочна скупштина Рускей матки (РМ), котра на тот завод будзе и виберанкова.
На Скупштини буду розпатрани Звити о роботи и представени финансийни звит РМ вообще, як и звити з месних одборох РМ у Руским Керестуре, Кули и Коцура, городского одбору з Нового Саду и реґионалного одбору зоз Шиду у 2017. року, як и плани за 2018. рок.
У виберанковей часци Скупштини, за цо потребни кворум од 25 присутних членох, будзе гласане о вибору предсидателя РМ, штирох подпредсидательох, секретара, членох Управного и Надпатраюцого одбору, як и Редакцийного одбору глашнїка РМ „Руснак”.
По дньовим шоре плановане и розпатранє предкладаня спред Форуму младих РМ за уключованє представнїкох Шветового форуму русинскей младежи до роботох комисийох Шветового конґресу Руснацох/Русинох/Лемкох (ШК РРЛ).
Попри тим, будзе винєшена и информация о наступним трецим зашеданю Шветовей ради РРЛ, Ревизийней ради ШК РРЛ, Комисиї за културу ШК РРЛ и зашеданю Шветового форуму русинскей младежи котри буду отримани у периодзе од 9. до 11. марца 2018. року.