РУСКИ КЕРЕСТУР – Нєшка, 5. априла, з початком на 18,30 годзин будзе отримана схадзка Управного одбору Рускей матки (РМ) у Руским Керестуре, у їх канцелариї у улїци Бориса Кидрича 60.
На дньовим шоре будзе розпатранє информацийох о проєктох з котрима РМ конкуровала на конкурси локалних самоуправох, покраїнских секретариятох и Министерства култури и информованя Републики Сербиї у 2018. року.
Будзе принєшена и конєчна одлука о кандидатови РМ за лауреата Шветовей ради РРЛ „Василя Турока Гетеша”, як и звити о 3. зашеданю Шветовей ради РРЛ, Комисиї за културу Шветового конґресу РРЛ и зашеданя Шветового форуму русинскей младежи у Бистри, у Румуниї.
Попри тим, плановане и розправяц о пририхтованю за одход на 10. Медзинародни биєнале лемковскей/русинскей култури у Кринїци у Польскей котри будзе од 19. до 20. мая, дзе будзе и зашеданє Шветовей ради РРЛ и конґресних комисийох за масмедиї, за ґранти, туризем и историю Руснацох.
На схадзки будзе бешеди и о троязичней табли котра ше находзи на уходзе до Руского Керестура, точнєйше о нєправилней назви виписаней на мадярским язику, и о можлївосци подношеня пригваркох на исту.