ЧЕРВИНКА – Манифестация „Сладки днї у шерцу Бачкей” у Червинки, друга по шоре, будзе отримана того викенду, 11. и 12. мая, а предвидзена богатша културно-уметнїцка програма, як и концерти.
Под час тирваня манифестациї будзе отворена Сладка улїца, у котрей буду представени продукователє лакоткох, у єдней часци буду и етно поставки, як и числени штанди орґанизацийох и здруженьох зоз цалей општини.
Нєшка, 11. мая, на 15 годзин почнє подобова колония за познатих малярох, алє и за талантовани дзеци з основних школох, потим на 16 годзин наступи Културно-уметнїцке дружтво „Сербия” з Кули, на 18, односно 19 годзин наступя „Динамика бенд” и „Carte Blanche”, а вечар од 21 годзин познати „Тропико бенд”.
Соботова програма почнє зоз змистами за наймладших, дзеци годни видзиц рижних аниматорох, мажореткинї, мадїоничарох и жонґлерох. Єдна часц будзе пошвецена домашньому спорту, а шицки заинтересовани ше годни змагац у виробку найсмачнєйшей „Яфа торти” и писаню писнї о Червинки як найсладшим месце.
Пополадньова програма, на 16 годзин, почнє з наступом културно-уметнїцкого дружтва з Червинки, як и госцох з околних местох. Од 20 годзин будзе концерт Ани Кокич, а од 22 Хариса Джиновича.
Орґанизаторе амбицийно наявюю же им циль же би тота манифестация преросла до єдней з векших у Войводини, та же надалєй иснує можлївосц преширеня змистох.