КУЛА/РУСКИ КЕРЕСТУР – Нєшка, 7. авґуста, у вечарших годзинох будзе пирсканє суньоґох зоз жеми у шицких населєних местох општини Кула. Препарати з котрима ше будзе пирскац опасни за пчоли, та ше апелує на пчоларох же би позаверали кошнїци.
Предсидатель Општини Кула Велибор Милоїчич гварел же прешлого тижня окончени контролни мераня, а на дзепоєдних локацийох утвердзене и седем раз векше число суньоґох. Концентрацию одроснутих суньоґох и ларвох у води провадзи Завод за явне здравє Зомбор и Ветеринарска станїца Кула.
Най здогаднєме, на схадзки Штабу за позарядово ситуациї котра отримана 3. авґуста, принєшене Наредзенє же би ше превжали нєобходни мири за зменшанє числа суньоґох, же би ше зменшало ризик од наставаня епидемиї горучки заходного Нилу, чийо пошлїдки можу буц катастрофални, а преноша ю суньоґи.