Нєшка почина „Петровски дзвон”

автор зам
1k Опатрене

ПЕТРОВЦИ (ГОРВАТСКА) – У Петровцох нєшка, 2. юния, почина тогорочна 44. найвекша манифестация култури Руснацох у Горватскей „Петровски дзвон” и тирва по нєдзелю, 4. юний. Манифестацию орґанизую Союз Русинох Републики Горватскей (РГ) и домашнє КУД „Яким Гарди”, а под покровительством Совиту за национални меншини РГ.

„Петровски дзвон” нєшка на вечар почнє з приказом звичаю рубаня майского древка у петровскей Етноґрафскей збирки, дзе на ютре, 3. юния, будзе отворена вистава малюнкох КУД Руснацох Осиєку, а потим у сали за схадзки будзе промоция трох кнїжкох – „Назви рошлїнох и животиньох у руским язику” Оксани Тимко-Дїтко, „Запах надїї” Владимира Провчия и алманаху „Думки з Дунаю” ґрупи авторох.

Литературно-музични вечар (у сали Дому култури), на хторим участвую руски писателє з Горватскей, на ютре почнє на 20 г., а як и цала Културна манифестация, Вечар пошвецени 90-рочнїци народзеня учительки Вири Гудаковей, 240-рочнїци снованя Крижевского владичества и 40-рочнїци шмерци др Федора Лабоша.

На нєдзелю, 4. юния, буду два манифестациї – на 11 годзин почина смотра музично-танєчней творчосци дзецох „Петровски дзвончок”, а участвую дзецински ансамбли КУД и ОШ з Вуковару, Петровцох и Миклошевцох, а на 15. г. почнє смотра музично-танєчней творчосци Руснацох у Горватскей „Петровски дзвон”.

На пополадньовей програми участвую ансамбли КУД Руснацох з Риєки, Заґребу, Винковцох, Райового Села, Осиєку, Вуковару, Петровцох и Миклошевцох и госци – ансамбли КУД „Томислав” з Велькей Церни и КУД „Филиповчици” з Комплетинцох.

„Петровски дзвон” на нєдзелю, 4. юния, будзе закончени з цаловечаршим концертом (на 20 г.) музичного ансамблу Дому култури Руски Керестур, односно Дзивоцкей шпивацкей ґрупи, вокалних солистох и дуетох и Велького народного оркестру Дому култури.

Културну манифестацию „Петровски дзвон” ше отримує з финансийну потримовку Вуковарско-сримскей жупаниї и Општини Боґдановци.

1-Dzvon-02

ПОВЯЗАНИ ТЕКСТИ