НОВИ САД – Руска редакция Радия, Радио-телевизиї Войводини, того мешаца будзе емитовац два нови радио драми.
Радио драми настали як проєкти радиодрамскей програми Радия Нови Сад, а буду емитовани штредком юния того року. У питаню тинейдж-драма „Перша любов”, Силвестера Дорокхазия у режиї Ксениї Бодянец хтору ґлуми екипа тинейджерох зоз Руского Керестура. „Перша любов” будзе емитована нєшка, 9. юния, у соботовей поладньовей програми, на 12,30 годзин.
Радио драму „Ковалє”, Милоша Николича, хтору у режиї Владимира Надя Ачима одґлумели ґлумци Руского народного театру „Петро Ризнич Дядя”, слухаче годни премиєрно послухац 16. юния, тиж у соботовей програми на 13 годзин.
Репризи обидвох драмох буду у Драмскей програми на габох Трецей програми Радия, Радио-телевизиї Войводини, хтора ше емитує у ноцним термину зоз стреди на штварток. Так радио драма „Перша любов” репризно будзе емитована 14. юния, а „Ковалє” 21. юния, на пол ноци.