РУСКИ КЕРЕСТУР/ЗОМБОР – У Привредним судзе у Зомборе нєшка, 17. октобра, на 12 годзин будзе судска розправа о Напредок пририхтаним планє реорґанизациї „АБЦ ФУД” з Руского Керестура, та кед будзе прилапени, дотерашнї, хтори дочасово мирує, престанє важиц. Перша судска розправа мала буц отримана 16. юния, алє є одказана пре доставанє часу за лєпшу пририхтаносц за розправу.
Поверительох з Керестура, векшином паприґарох, заступа адвокатка Мария Йоксович, котра на нови план реорґанизациї придала 20 зауваги, медзи нїма и вимогу за видзельованє поверительох з „Д-класи” до окремней, прекладанє документох на руски язик и водзенє розправи и по руски.
У Напредок пририхтаним планє реорґанизациї „АБЦ ФУД” медзи иншим предложене же би ше уж за 40 одсто зменшани остаток длуства паприґаром и малим фирмом зменшало за 60 одсто и виплацовало го пейц роки, з мированьом од дзевец мешаци и рочну камату 1 одсто.
За розлику од поволованя на першу розправу у юнию, поволанки Керестурцом тераз нє посилани, алє оглашка о заказаней розправи виложена на огласней табли Привредного суду у Зомборе. На судскей розправи можу присуствовац шицки поверителє Хладзальнї.