КУЛА – Нєшка, 4. мая, з початком на 19,30 годзин, у просторийох РКУД „Др Гавриїл Костельник” у Кули, будзе отримана схадзка Управного одбору Рускей матки (РМ), а у фокусу буду средства достати по конкурсох.
По дньовим шоре запланована догварка о составе делеґациї РМ и госцох котри пойду на X Медзинародни биєнале лемковскей/русинскей култури у Кринїци у Польскей котри будзе 19. и 20. мая.
Буду винєшени резултати конкурсох на котри РМ конкуровала зоз проєктами, при локалних самоуправох Кула и Шид, покраїнских секретариятох АПВ и Министерству култури и информованя Републики Сербиї.
Попри тим, на схадзки будзе розпатрана и информация о запровадзеней розправи о Нарису закона о вименкох и дополнєньох Закона о националних совитох националних меншинох и поступку його прилапйованя.
Будзе розпатрана потреба и можлївосци за реаґованє на поступок поставяня мраморових плочох покойних преднякох Союзу Руснацох Українцох Сербиї од його снованя, у порти парохиялней грекокатолїцкей церкви Святих апостолох Петра и Павла у Новим Садзе.