Нєшка ше руша на „Русински фестивал”

автор ядю
1k Опатрене

СВИДНЇК (СЛОВАЦКА) – На тогорочни „Русински фестивал” у Свиднїку у Словацкей, котри почал 21., а тирва по 27. май, нєшка руша и делеґация и учашнїки зоз Руского Керестура, Вербасу, Коцура и Нового Саду.

На Фестивалу ше на соботу, 26. мая, представя аматере КПД „Карпати” зоз Вербасу, кед у двацецминутовей програми зоз вецей композициями наступи руска Жридлова шпивацка ґрупа зоз провадзацим оркестром, а свою точку будзе мац и солистка Славка Тамаш. З вербаскима аматерами до Свиднїку путує и предсидатель Дружтва Славко Барановски и подпредсидатель др Деян Загорянски, як и делеґация Општини Вербас на чолє зоз єй предсидательом Миланом Ґлушцом. Цалу орґанизацию одходу на Фестивал на себе вжала посланїца у Народней скупштини Републики Сербиї Олена Папуґа.

Под час пребуваня у Словацкей, уж на пияток дополадня ше зайдзе до Кошицох и Прешова. На соботу ше нащиви Бардейов, Бардейовски Купелї и Дуклю (дзе ше находза древени церкви), а на нєдзелю, 27. мая, дополадня ше пойдзе до церкви, на 14 годзин почина програма и тирва до 18 годзин, после чого ше руша дому.

У, як и каждого року, богатей и рижнородней програми буду участвовац и велї музично-танєчни ансамбли зоз Словацкей, медзи нїма и ПУНА з Прешова, „Русиния” з Гуменого и „Маковица”, шпивацки ґрупи „Калина”, „Бабово унуки”, „Шестри Углярово”, а будзе и надосц наукових сходох и роботньох, як и представа прешовского Театру „Александар Духнович”. Цалу програму мож опатриц на сайту Фестивала.

Фестивал орґанизує Окружна орґанизация Рускей оброди у Свиднїку зоз соорґанизаторами, а под покровительством Яна Гирчка, заменїка предсидателя Прешовского самоуправного краю.

ПОВЯЗАНИ ТЕКСТИ