НОВИ САД – Покраїнски секретарият за польопривреду, водопривреду и лєсарство вчера орґанизовал роботну схадзку о стану кукурици на польох у АП Войводини, з окремним наглашеньом на присуство микотоксинох у тей житарки.
Зоз схадзки упутени апел польопривреднїком най нє понагляю з ламачку и контролую влагу зарна, бо гоч випатра сухе, влага висока. Як поведзене, пре сушни рок род кукурици будзе зменшани, та нє треба правиц дополнююци трошки за сушенє зарна.
Друга препорука зоз схадзки же би ше уж у ламачки видвойовало чутки хтори почали плєшнїц и же би ше таки чутки перши хасновало.
Бешедоване и о применьованю превентивних мирох, як цо то дезинфекция силосох и других маґазинох пред приємом зарна нового роду. Зоз законом предвидзене дезинфикованє, дератизация, дезинсекция и фумиґация обєктох за одкладанє зарна, цо реґуловане з предписанями Министерства польопривреди, водопривреди и лєсарства.
На схадзкки присуствовали помоцнїки покраїнского секретара за польопривреду Младен Петкович и Марко Ровчанин, совитнїк министра за польопривреду, водопривреду и лєсарство Саня Буґарски, руководитель Проґнозно-звитней служби Войводини др Драґиша Янкович, др Ґоран Бекавац з Институту за польодїлство и заградкарство у Новим Садзе, др Оливера Дюраґич з Институту за поживово технолоґиї у Новим Садзе и др Стеван Маширевич з Польопривредного факултету у Новим Садзе.