Нє страцел руску свидомосц

автор маф
1.3k Опатрене

У Руским Керестуре нєдавно пребували Гавриїл и Геленка Колєсарово, хтори уж 22 роки жию у Кичинеру у Канади. Гавриїл наш дакедишнї колеґа, понеже вецей як 24 роки препровадзел як новинар и редактор у „МАК-у” и „Руским слове”. И у Канади у шлєбодним чаше предлужел з новинарску роботу и орґанизованьом Руснацох. Вельо поробел на тим полю, нє мож шицко анї змесциц до того напису.

Колєсарово ше 1995. року преселєли з Нового Саду до Канади, а о причинох того велького крочаю Гавриїл толкує:

– Ми нє були тота основна имиґрацийна габа як цо людзе концом 19. вику, хтори одходзели до швета з биди… Ми мали шицко и ту, алє зме нє мали мир, будучносц… Я нє знал цо нас чека, два раз ме приходзели волац на фронт, син бул осма класа, тиж доходзел до реґрутациї… нє сцели зме нїч ризиковац. Пошли зме до Канади и почали од початку, гоч зме були и образованши и однєсли зме пенєжи, та зме о два роки могли купиц и свою хижу.

ДЗЕЦИ ШЕ ЛЄГКО ПРИСПОДОБЕЛИ

По Гавриїлових словох, анї тот початок им нє бул таки чежки, бо пошли до блїзкей родзини хтора им помогла знайсц ше, найсц роботу, дзеци предлужели школованє. Дзивка Ґабриєла закончела микробиолоґию, а вец и мастер и маґистратуру, и такой достала роботу. Син Желько тиж швидко напредовал у штреднєй школи, а закончел студиї за компютерске програмованє и математику.

– Зоз Жельком ше нам, можем повесц, на єден способ витворел „америцки сон”. Вон бул барз талантовани одбойкаш, дзе ше як бавяч оформел ище як пионир у новосадскей „Войводини”. У Канади ше уписал до штреднєй школи хтора тиж преферовала одбойку, та у тиме були найлєпши у Онтарию од 400 екипох. През лєто го тренер „жичал” колеґови до Рочестеру у Америки, дзе го тиж одличне бависко одведло до Даласу, Ню Орлеансу, Калифорниї… и вшадзи найвекши припознаня и екипно и поєдинєчно –  приповеда Колєсар.

Три ґенерациї Колєсарових - Гавриїл зоз сином Жельком и унуками Тонийом и Ендийом

Три ґенерациї Колєсарових – Гавриїл зоз сином Жельком и унуками Тонийом и Ендийом

Як дознаваме, Желько дзекуюци одбойки у Америки закончел и студиї, а могол виберац и Универзитет од седем понуканьох и стипендию.  Вибрал Пен Стейт у Пенсилваниї цо нє було так далєко од родичох. Там упознал и будуцу супругу, достал роботу, а нєшка жию у Южней Каролини, и як гвари Колєсар, подаровали им двох милих унукох. Док тото пишеме, сиґурно ше им народзел и унучок од дзивки Ґабриєли. Виполнєти як родичи, дїдо и баба, жию свойо мирни пензионерски днї, опущени у шицких нормалних условийох, а таки животни стандард би ту сиґурно нє мали.

– У Канади зме створели свойо гнїздочко, и нїґда зме нє побановали же зме пошли. Нормално же спочатку було носталґиї, поготов при моєй супруги док нє почала робиц. Я за носталґию нє мал часу, робел сом у у вецей компанийох, бо сом о 6 роки закончел за контролора квалитету у автоиндустриї и робел у велькей компаниї „Линемар”. Лєгко сом ше знашол и у другей фабрики на компютеризованих машинох, и дошол сом до пензиї 2013. року. Я у новинарстве, ту у Войводини, препровадзел 24 и дацо роки, а там сом 18 роки робел цалком на других роботох. То ми барз одвитовало прето же сом ше з новинарством занїмал у шлєбодним чаше – здогадує ше Колєсар.

ВЕЛЬО ДОПРИНЄС КУЛТУРНОМУ ЖИВОТУ РУСНАЦОХ

Дзекуюци тому же у души заш лєм остал новинар и Руснак зоз вельку свидомосцу, Гавриїл Колєсар и у Канади дал значне доприношенє културному животу наших людзох. Бул єден з иницияторох же ше основало Дружтво Руснацох Сиверней Америки, и редактор його „Глашнїку”, видавал и маґазин „Руснаци у швеце”, оформел даскельо руски веб-сайти, порушал дониранє Войводянским Руснацом.

– Кед зме сцигли до Кичинеру, там уж було вецей як 20 нашо фамелиї, подобни по рокох як ми, и з радия, и музични фаховци, людзе хтори и приблїжного полєту, як наприклад Славко Надьмитьо, хтори вєдно зо мну бул 17 роки у целох „Червеней ружи”. У Дружтве за руски язик сом бул секретар и предсидатель, та зме знали шицки орґанизацийни роботи, а звладал сом и писанє статута и правилнїкох. Там нас тримал тот полєт и ми концом децембра истого року як я сцигнул, основали Дружтво. Таки зме ше моцни чувствовали же Држтво обдумало наш живот – два пикники (лєтнї и єшеньски), жимски бал, и други стретнуца, та на концу Дружтво примало нових приселєнцох, помагало им, а мали зме соботами и руску школу за дзеци. Хто бул за цо валушни, пробовал допринєсц. Я знал писац, та гайд, будзем писац периодични билтен кажди два-три мешаци и наволали зме го „Глашнїк руского дружтва Сиверней Америки”. То почало у компаниї Юлина Сабадоша, на фотокопиру сом спомнути глашнїк умножовал, а од 12. по 16. число уж були рамики у фарбох, 28-30 боки – здогадує ше Гавриїл.

Медзитим, як приповеда, по 2002. рок їх полєт опаднул прето же людзе вошли до рутини, мали роботи, куповали хижи, школовали дзеци, мали тоти бриґи, та им вше менєй було до роботи Дружтва. Руководзенє препущене младшим, та Дружтво и нєшка роби лєм з менєй активносцами.

– Престал сом видавац и „Глашнїк”, хтори бул лєм о Дружтве и лєм за Канаду. Алє новинарство и далєй кучало у мнє – предлужує Колєсар хтори ма вельку заслугу же повязал наших виселєнцох у цалим швеце. – Видзел сом же єст можлївосци покапчац шицких Руснацох виселєнцох швета и у Америки, Австралиї, Канади и цалей Европи, бо сом бул на вязи зоз Фирисом у Шведскей, з др Бараном у Нємецкей, у Австриї сом мал пар людзох, у Австралиї тиж, у Канади громаду. Концом 2002. порушал сом часопис „Руснаци у швеце” хтори бул зоз тварду концепцию. Рамики и шицко нука було у фарбох 28-32 боки,  виходзел кажди штири мешаци, и тот час бул цалком достаточни єдней особи порихтац, бо материялу було. У рамикох того бул цали бувши Глашнїк РДСА, о активносцох у Канади, алє и написи о активносцох, зоз 7-8 державох, и наисце, уж од самого початку бул глашнїк за шицких Руснацох виселєнцох. У 34-ох числох дати коло 200 портрети, а виходзел по 2013. рок. Интернет ше указал як благородне дїло хторе нас повязало.

Як познате, Колєсар медзи нашима виселєнцами иницировал и дониранє перше керестурского ФК „Русин”, а нєдавно и видавательну дїялносц Дружтва за руски язик. Як гвари, з тим и предлужи, а главна преокупация за презентованє Руснацох му тераз интернет. Як гвари, у планє и нови проєкти. О нїх ище учуєме.

ПРЕЗЕНТОВАНЄ РУСНАЦОХ НА ИНТЕРНЕТУ

Колєсар швидко похопел вредносц новей технолоґиї и уж 1996. року почал хасновац интернет.

– О два роки виробел сом перши свой сайт на интернету „Руснаци у швеце”, а предо мну лєм два-три мешаци Желько Пап у Сиднею направел сайт „Руснаци” и обидва нарок означа 20 роки стажу. 

Я тераз унапрямени на интернет, на ньго кладзем шицко, и тексти и музику. Направел сом и нови веб-сайт „Русин-тюбе” (Русинска тюб), на хторим мож видзиц шицки тоти 3 000 видеа о Русинох з Войводини (цо знїмам з

РТВ Войводини), плус линки по обласцох за шицки видеа зоз Прешовщини, Лемки цо кладу, шицко систематично поробене и лєгко доступне.

24-25 DSC_0081

ПОВЯЗАНИ ТЕКСТИ