Обявени конкурс за упис до штреднєй школи

автор днв/зам фото маф
944 Опатрене

СЕРБИЯ – Министерство просвити и науки розписало конкурс за упис школярох до штреднєй школи за школски 2017/18. рок, на хтори ше од 29. мая по 9. юний годни приявиц шицки школяре котри закончели основну школу, а народзени су после 31. авґуста 2000. року, док старши можу конкуровац за позарядових школярох, преноши новосадески „Дневник”.

Кандидати за штредню школу буду ранґовани на основи общого успиху у шестей седмей и осмей класи ОШ и резултатох на Закончуюцим испиту, а од того року знова и на основи успихох на змаганьох. За ґимназию и штиророчни штреднї фахово школи за упис треба найменєй 50 боди.

За успих у ученю у ОШ максимално мож достац 70 боди, а за витворени успих на Закончуюцим испиту максимално 30 боди.

Школяре котри на мадзинародних змаганьох освоєли перше, друге, лєбо треце место, на упису доставаю дополнююци 20, 18, лєбо 14 боди, а за исти места на републичних змаганьох 8, 6 и 4 боди.

Закончуюци испит почнє 14. юния, кеди будзе тест з мацеринского язика, 15. юния з математики, а 16. юния комбиновани тест.

Формулари зоз своїма жаданями за упис до штреднїх школох осмаки буду придавац 24. и 25. юния, ризпорядок до школох будзе познати 3. юлия, а упис до штреднїх школох будзе 4. и 5. юлия.

Приявйованє за примаци испити до балетских, музичних и дизайнерских штреднїх школох, до ґимназийох за талантованих школярох (за математику, физику, компютери и информатику), до филолоґийних ґимназийох, як и до штреднїх школох дзе настава билинґвална, почало вчера, а тирва по пондзелок.

ПОВЯЗАНИ ТЕКСТИ