РУСКИ КЕРЕСТУР – Од 17. юния по 1. юлий до Добродзечного огньогасного дружтва (ДОД) у Руским Керестуре мож принєсц огньогасни апарати на препатрунок, а попри тим, компетенти виходза и на терен, односно до обисцох парастох препатриц механїзацию за тогорочну жатву. Препатранє апаратох у Огньогасним доме кажди дзень од 18 до 20 годзин.
– Векшина механїзациї за жатву уж и препатрена и за тото ма одвитуюци потвердзеня. Препатрунок комбайну кошта 1 500 динари, трактора 500, а огньогасного апарату типу С2 1 300 динари – гварел за Рутенпрес предсидатель ДОД Михал Рац.
Пре зменшаня ризику од огня у жатви, у складзе зоз Законом о защити од огня, предсидатель Општини Кула Перица Видеканїч принєсол забрану палєня сцернянки у хотаре, а накадзи почнє косидба жита, почнє и нєпреривне дежурство керестурских огньогасцох.