РУСКИ КЕРЕСТУР – Национални совит (НС) Руснацох у тим школским року додзелї єденац стимулациї у форми стипендиї школяром першей класи руского оддзелєня Ґимназиї „Петро Кузмяк” у Руским Керестуре, а нє 10, як було дотераз, одлучене на електронскей схадзки НС, хтора тирвала од 12. по 14. септембер (до 12 годзин).
Єдна стипендия вецей додзелєна на вимогу Школи „Петро Кузмяк”, понеже двойо школяре котри сполнюю условия за стипендованє маю исте число бодох.
Стипендия мешачно виноши 5 000 динари, достава ше ю 10 мешаци, а попри тим, НС Руснацох у новим школским року за єдну школярку з Коцура у цалосци плаци и пребуванє у керестурским интернату.
На истей електронскей схадзки ше гласало и о предкладаню за члена Совиту за медзинационални одношеня Општини Шид, на писмену вимогу з тей оштини, понеже дотерашньому членови Мирославови Цирбови вишол мандат.
НС Руснацох предложел же би руску националну меншину у Совиту за медзинационални одношеня Општини Шид тераз представял Деян Бобаль з Бикичу.
„За” горе спомнути одлуки на електронскей схадзки гласали 14 члени НС, а пецеро члени нє гласали.