НОВИ САД – Завод за културу войводянских Руснацох розписал Явну поволанку за софинансованє програмох и проєктох анимированя рускей заєднїци у штредкох дзе руска заєднїца малочислена, а будзе тривац по 12. авґуст.
Конкурс ше одноши на програми очуваня и пестованя нєматериялного културного скарбу рускей заєднїци и за проєкти сучасней уметнїцкей творчосци рускей заєднїци чия реализация предвидзена у 2018. року.
Вкупна сума наменских средствох од Националного совиту Руснацох виноши 100 000 динари, а мож кункуровац з рижнима проєктами у обласци култури, музичней култури, театралней творчосци, музично-сценскей, танєчней, подобовей и применєней, видео и мултимедиялней и диґиталней. Ґу тому, програми и проєкти ше можу одношиц и на медзиреґионалне сотруднїцтво и госцованя у иножемстве, як и виглєдованя, очуванє и презентованє сучасней уметнїцкей творчосци рускей заєднїци котри ше реализує у сотруднїцтве зоз фаховима здруженями и институциями.
На Явну поволанку ше можу приявиц здруженя у култури, установи и други правни особи (котри того року ище нє участвовали у розписанох конкурсох Заводу) з одвитуюцу документацию котру мож превжац у просторийох Заводу (Футожска ч. 2), лєбо на сайту www.zavod.rs.