НОВИ САД – Початком тижня будзе видруковани „Руски християнски календар за 2019. ро”. Тота наша традицийна руска кнїжка настала у сотруднїцтве НВУ „Руске словоײ зоз Нового Саду и Християнского часописа „Дзвони” з Руского Керестура, а з благословом и посланїцу преосвященого владики кир Георгия Джуджара.
Ношаци теми у тогорочним Календаре вязани за рочнїци яки будземе означовац у наступним року, а то насампредз 100-рочнїца Руского народного просвитного дружтва, о хторим статю написал професор др Янко Рамач, як и 100-рочнїцу присоєдинєня Войводини ґу Кральовини Сербиї 1918. року и улоги Йована Храниловича, грекокатолїцкого новосадского пароха у тим важним историйним процесу, о чим пише професор др Дюра Гарди. Статю о 25-рочнїцї християнского часопису „Дзвониײ подписує перши редактор часопису, Михал Рамач.
У блоку за културу свойо видзенє о актуалних проблемох у нашей култури виноши Олена Планчак Сакач, зоз акцентом на брендиранє културних доброх, а академик Юлиян Тамаш подписує есей „О гашеню духовних и дружтвених огньо”. У блоку за литературу обявени приповедки, есеї и писнї авторох рижних ґенерацийох, а окреме богати блок за младих.
Календар дакус обсяжнейши як влонї, богати є зоз темами, а мож го купиц за 500 динари при наших колпортерох, як и у просторийох „Руского слова” у Новим Садзе и Руским Керестуре, як и на дзепоєдних парохийох.