НОВИ САД – Предсидатель Покраїнскей влади Иґор Мирович, вєдно зоз подпредсидательку Влади Сербиї Зорану Михайлович и комесарку Европскей униї за транспорт Виолету Булц вчера обишол будовалїще нового гайзибанского моста у Новим Садзе, дзе сцигли на гайзибану, першираз после 19 рокох од кеди мост звалєни у НАТО аґресиї.
Предсидатель Мирович виражел задовольство же од 6. априла гайзибански транспорт на Жежельовим мосце будзе пущени до роботи и же о даскельо мешаци, у координациї зоз городом Новим Сад, на Жежельовим мосце будзе пущени и драгови транспорт.
Министерка Михайлович наглашела же представнїки Влади Сербиї, Покраїнскей влади, Городу Нови Сад и Европскей комисиї на тижньовим уровню провадзели напредованє роботох. Комесарка Европскей униї Виолета Булц виявела же мост ма моцну символику, прето же Сербия сполнєла обецунку котру дала пред роком на тим истим месце.
Вона гварела же Европска уния софинансовала його будованє зоз суму 50 милиони евра, Уния обезпечела 40 милиони евра, а ту уходзи и пенєж за приступни драги, дзе зоз штирох милионох Уния видвоела три милиони евра. Городоначалнїк Нового Саду Милош Вучевич гварел же зме обновели тото цо зме страцели 1999. року.