НОВИ САД – Пондзелок, 10. децембра, у Скупштини АП Войводини у Новим Садзе, отримана шветочносц з нагоди Медзинародного дня людских правох у рамикох котрей и 50-рочнїца роботи прекладательней служби у орґанох Покраїни.
Шветочни сход отворел предсидатель Скупштини АП Войводини, Иштван Пастор хтори надпомнул же пред єдним мешацом парламент Европи вигласал Резолуцию о минималних стандардох за меншински заєднїци у Европскей униї.
– Одряднїци Резолуциї зме давно витворели з численима новима и старима предписанями и Законску реґулативу. Остатнї вименки Дїловнїка о роботи Скупштини АП Войводини, витворена можлївосц же би посланїки доставали материяли на мацеринскей бешеди, гварел предсидатель Пастор,
Покраїнски секретар за образованє, предписаня, управу и национални меншини–национални заєднїци, Михаль Нїлаш, повинчовал вельки ювилей прекладательней служби. Вон надпомнул же служба як и потераз будзе мац потримовку ресорного секретарияту, а тиж так и Покраїнскей влади.
Шветочносци присуствовал заменїк Покраїнского омбудсмана, дакедишнї директор прекладательней служби, Янош Орос як и представителє штирох оддзелєньох прекладательней служби, а у мено оддзелєня на Руским язику бешедовала мр Гелена Медєши.
Потим у голу Влади АП Войводини, предсидатель Влади Иґор Мирович з нагоди Медзинародного дня людских правох повинчовал швето присутним. Предсидатель Мирович надпомнул же Влада на чиїм є чолє подполно пошвецена змоцньованю свидомосци о людских правох и обезпечованю дружтва у хторим панує толеранция без предрозсудкох и дискриминациї.
Покраїнски секретар за културу, явне информованє и одношеня зоз вирским заєднїцами Драґана Милошевич, з тей нагоди надпомла же право на пестованє културного идентитета и потримовка информованю на язикох националних меншинох найзначнєйши людски права хтори зоз конкретнима програмами потримує Покраїнска влада.
