СЕРБИЯ/ШВЕТ – Вчера, 3. мая, и у нашей жеми означени Шветови дзень шлєбоди медийох, хтори Ґенерална скупштина Зєдинєних нацийох (ЗН) запровадзела 1991. року пре звекшанє свидомосци о значносци шлєбоди медийох, як и же би ше державни власци здогадло на длужносц почитованя и потримовку шлєбоди виражованя, цо заґарантоване з Универзалну декларацию о людских правох.
Поверенїк за информациї од явного значеня Родолюб Шабич з тей нагоди наглашел же ше муши знац хто власнїки медийох, та же явносци муша буц доступни шицки информациї о финансованю медийох з явних жридлох.
На поволанку Здуженя новинарох Сербиї и Нєзависного здруженя новинарох Сербиї електронски медиї вчера на пейц минути до 12 годзин претаргли свою програму, з чим потримали медзинародну акцию „Пейц минути громкогласней цихосци” и спозорели явносц на чежке положенє новинарох у Сербиї.
Ґенерални секретар ЗН Антонио Ґутереш вчера поволал на защиту медийох, наглашуюци же нєобходна „заєднїцка борба за нашо право на правду”.
– Шлєбода медийох унапредзує мир и правду за шицких. Шлєбода медийох ключна у борби процив дезинформацийох. Потребна заєднїцка борба за нашо право на правду – гварел Ґутереш.