Нєдавно вишло пияте число младежского часопису МАК, цо половка од того кельо раз рочнє виходзиме. А як кед би лєм тераз була преслава МАК-ового 45. родзеного дня. Рок прелєцел, а мож повесц же 2017. прешол досц продуктивно. Бул то други рок як МАК почал виходзиц мешачно, точнєйше, дзешец раз рочнє, два раз як двочисло. Гоч на початку нє випатрало так, до конца рока видруковани и роман у приповедкох, дзелєло ше символични дарунки, а у сотруднїцтве з другима обявени и два музични албуми и даскельо синґли, правда, у електронскей форми, алє факт же то нєшка младим баржей и одвитує, бо велї уж анї нє маю дзе положиц компакт-диск. Мали зме даскельо промоциї, а спомнута преслава МАК-овей рочнїци у РКЦ-у прешла, голєм з моїма очми патрено, барз добре. Могло ше видзиц же тот наш єдини часопис за младих ище ма перспективу, як и тото же кажда ґенерация младих хтора прешла през МАК охабела иншаки шлїди за собу, и же ше нє треба обрацац назадок и поровновац як то було дакеди, алє „дихац” зоз терашню ґенерацию младих, провадзиц и прилагодзовац ше ґу їх интересованьом и часу у хторим жиєме.
Праве тото ше и ми трудзиме уж даскельо роки – понукнуц младим часопис хтори провадзи сучасни тренди. Тото цо ше нєшкайшей младежи вшелїяк муши понукнуц то модерни випатрунок, односно дизайн, цо шицки найчастейше перше и обача кед МАК вежню до рукох. Вец их то прицагнє же би го и пречитали, лєбо голєм позакуковали цо у нїм єст. Того би нє було без Златка Емейдия, ґрафичного инжинєра и дизайнера, хтори уж пияти рок роби дизайн и компютерски обробок МАК-у. Тото цо верим же тиж так нє мож нє обачиц то фотоґрафиї на насловних бокох, хтори тиж робя млади, а найчастейше професийна фотоґрафка Андреа Новак. Вшелїяк, МАК-у би нє було и без наших младих будуцих новинарох, поетох, писательох, без младих фаховцох з рижних обласцох… У креїрованю часопису у 2017. року участвовали коло 60 млади (од 14 по 30 роки) зоз Руского Керестура, Коцура, Дюрдьова, Нового Саду и Шиду. Даєдни з нїх поряднє сотрудзую з МАК-ом, а даєдни ше праве прешлого року уключели, на нашу поволанку, лєбо самоинициятивно, так як и того року. Маме велїх хтори уж роками поряднє пишу, лєбо на даяки иншаки способ сотрудзую з МАК-ом, та мож провадзиц и як дозреваю вєдно з нїм. Напевно же нїкому нє почкодзи кед раз до своєй биоґрафиї напише же сотрудзовал зоз єдним часописом.
„МАК-ов квет” нє заварти, алє вше „розквитнути”, та и отворени за шицких младих, цо мож видзиц и по тим же го у шицких аспектох творя праве млади. Вони и пишу о тим цо их интересує, алє о шицких темох, нє лєм о тих хтори ше дотикаю нас, Руснацох, бо ше и нашо млади школую по истей системи, робя исти роботи, маю исти гобиї и интересованя, жию у истим дружтве и истим чаше як и шицки други млади. Но, вшелїяк же насампредз зазначуєме збуваня хтори орґанизую нашо млади, же пишеме о наших успишних школярох, студентох, музичарох, спортистох, активистох… бо праве тото мож попровадзиц лєм у МАК-у, и наших других медийох.
Так и того року, провадзиме шицко спомнуте, виходзиме кажди мешац, окрем у юлию и авґусту, алє праве прето у юнию и септембру буду двочисла. Цо ше дотика даяких додаткох, затераз ище нєт у плану же би того року вишло дацо вєдно з МАК-ом, лєбо на сайту, цо нє значи же ше то у цеку рока нє пременї.
Як и у шицким, вшелїяк же и у МАК-у нє шицко „мед и млєко”. Чежше тримаме крочай з порядним виплацованьом гонорарох, алє младим свидомосц о тим кельо тот часопис за нас значни, здобуванє искуства, роки сотруднїцтва, даваю мотив же би поряднє робели. Тиж так, предплатнїкох нєт тельо кельо их було дакеди, алє кед роздумаме же млади нєшка нє бежа до трафики купиц гоч хтори тинейджерски часопис так як скорей, вец то цалком розумлїве. Праве прето им шицки числа МАК-у, як и даєдни поєдинєчни тексти понукаме и на сайту, бо нашим терашнїм читачом то тераз у ствари и природнєйши и прилаплївши способ информованя.
Та кед ше о дзешец, лєбо уж кельо роки ма случиц тото же то и МАК-у будзе єдина форма виходзеня, вец най будзе так, бо процив того нє мож. А до теди ґураме напредок и робиме так як тераз знаме и можеме.