Основношколци успишни з математики

автор маф
1.1k Опатрене

РУСКИ КЕРЕСТУР – И керестурска Основна школа „Петро Кузмяк” ше нєшка уключує до националного змаганя з математики „Мислиша”, хторе у шицких школох у Сербиї почнє источашнє, на 12 годзин. З керестурскей Школи буду ше змагац 63-йо школяре од другей по осму класу.

На Општинским змаганю з математики успишни були Ґлориян Штранґар з пиятей класи, хтори завжал треце место и пласовал ше на Окружне змаганє у Зомборе 25. марца. На тото змаганє ше пласовал и Алекса Ґолубович зоз штвартей класи, хтори на Општинским достал похвалу, алє пре вецей як 50 посцигнути боди идзе далєй.

На Општинским змаганю успишна була и школярка трецей класи Сара Боцка хтора достала похвалу. Школярох за змаганє пририхтали Наталия Будински, Нада Колошняї и Наталия Зазуляк.

На Општинским змаганю 3. марца школяре осмей класи Леон Юрич и Борис Бодвански посцигли друге, одн. треце место, алє по числу бодох нє виборели дальши пласман. За змаганє их пририхтала Єлена Петько.

На соботу, 10. марца, керестурска Школа будзе домашня Окружному змаганю з физики. Буду ше змагац 52-йо школяре, алє медзи нїма нє будзе домашнїх змагательох.

ПОВЯЗАНИ ТЕКСТИ