НОВИ САД – Пияток, 13. октобра у Историйним архиву Городу, отворена вистава „Три вики Алмашского краю” зоз хтору ше означує 300 роки иснованя єдней з найстарших часцох Нового Саду.
Вистава облапя розвой и иснованє Алмашкого краю през историю, його археолоґийни, етнолоґийни, архитектонски, културно-историйни и социолоґийни розвой тей часци города. Алмашски край, єдна з найстарших часцох Нового Саду и облапя улїчки медзи Темеринску, Ґундуличову, Дьордя Райковича, Матици сербскей и Площу Този Марковича. Назву достал по гражданох хтори ше ту приселєли зоз места Алмаш, а по нєшка остали ище назви „Алмашска улїца” и „Алмашска церква”. Тота часц городу нєшка преширена и мено єй пременєне на Подбара.
Виставу отворел член Городскей ради за културу Далибор Рожич, а пририхтали ю Завод за защиту памятнїкох култури Городу Нового Саду у сотруднїцтве зоз Историйном архивом Городу Нового Саду, Здруженьом гражданох „Алмашанє”, Основну школу „Иван Ґундулич” и Департманом за архитектуру и урбанизем на Факултету технїчних наукох Универзитета у Новим Садзе.
Вистава будзе отворена по 11. децембер у Историйним архиву Городу, у Улїци Филипа Вишнїча 2а.