ВЕРБАС – Орґанизацийни одбор Фестивалу розписал конкурс за 30. „Невенов фестивал дзецох поетох”, за дзецинских авторох хтори пишу писнї або кратки лирски приповедки на шлєбодну тему, котри будзе отримани 18., 19. и 20. мая 2018. року у Савиним Селу.
Приповедки и писнї можу буц написани и на странским язику, або язикох националних заєднїцох, алє муша мац приложени преклад на сербски язик. Шицки роботи у штирох прикладнїкох треба послац найпознєйше по 15. април на адресу: Невенов фестивал дзецох поетох, 21 467 Савине Село.
Шицки информациї о конкурсу мож достац и при предсидательови Орґанизацийного одбору Фестивалу, Новови Чулафичови на телефон 064 186 45 31, а список финалистох будзе обявени у дньових новинкох и Часопису за дзеци „Невен”.
„Невенов фестивал дзецох поетох” постал значни медзинародни фестивал хтори на окремни способ пестує дзецинску творчосц, а того року ше отримує трицети раз.