РУСКИ КЕРЕСТУР – На вечар отриманей Месней смотри рецитаторох у рускокерестурским Доме култури, у младшим возросту перше место освоєла Ема Живкович, друге Иван Планчак, а треце Яна Варґа.
У катеґориї штреднього возросту за найлєпшу рецитаторку вибрана Ребека Семан, друга була Минеа Югас, а треца Валентина Новта, док у катеґориї старшого возросту перше место завжал Мирослав Малацко, друге Павлина Шепински, а треце Тимеа Будински.
На смотри у трох возростох наступели 26-еро рецитаторе, а пред нїма наступели и двойо наймладши з керестурскей дзецинскей заградки „Цицибан”, ПУ „Бамби” з Кули.
На початку Месней смотри водителька Адрияна Надь шицких присутних поволала же би з минуту цихосци дали чесц и здогадли ше на Михайла Зазуляка Зулю, новинара и длугорочного активисту у нашей култури, а окреме у рецитаторским руху.
Селекторка шицких смотрох у општини Кула, та и керестурскей, була Слободанка Настасич, а консултант за руски язик бул Александер Мудри.
Рецитаторох у младшим возросту пририхтали Наталия Зазуляк, Оленка Живкович и Ксения Бодянец, а у штреднїм и старшим Ивана Дудаш и Мая Зазуляк Гарди.
Змаганє з музичнима точками и своїма наступами прикрашели школяре керестурского оддзелєня Школи за основне музичне образованє з Кули.
Котри рецитаторе ше з Месней смотри пласую на општинску будзе ше знац 5. марца, док ше отримаю месни смотри у шицких местох кулскей општини. Керестурска смотра була перша, а орґанизовал ю Дом култури и Културно-просвитна заєднїца општини Кула.