Отримана Општинска смотра музично-фолклорней творчосци

автор мар
815 Опатрене

РУСКИ КЕРЕСТУР – У Велькей сали Дому култури у Руским Керестуре всоботу, 27. мая отримана 57. Општинска смотра музично-фолклорней творчосци за старших, того року з обласци пестованя жридловей творчосци.

Участвовали културно-уметнїцки дружтва з векшини местох, односно домох култури и КУД-ох у кулскей општини, хтори пестую сербску, чарногорску, мадярску, українску и руску жридлову творчосц.

Дом култури Руски Керестур на Општинскей смотри участвовал з Дзивоцку шпивацку ґрупу, хтора шпивала руски народни шпиванки „Мамо моя мамо” и „Там у лєше”, Хлопску шпивацку ґрупу зоз шпиванками „Богач, богач” и  „Кед сом ишол по шоре”, як и Народним оркестром, котри одграл хоровод „Швитанє”. За Смотру их пририхтал Мирко Преґун.

Руске КУД „Др Гавриїл Костельнїк” з Кули на Смотри наступело зоз Женску шпивацку ґрупу, односно рускима народнима шпиванками „Ой плаче голубица” и „Нїґда я то нє верела”, и Хлопску шппивацку ґрупу, хтора шпивала народну шпиванку „Коло нашей хижи дражка виґажена”. За змаганє их пририхтала Еуфемия Планкош.

По спознаньох Рутенпресу, шицки учашнїки, односно їх точки, пласовали ше на Зонску смотру.

ПОВЯЗАНИ ТЕКСТИ