ШИД – На Скупштини Културно-просвитного дружтва (КПД) „Дюра Киш“, хтора у Шидзе отримана пондзелок, 10. априла, прилапени Звит о роботи Дружтва за прешли рок, хтори поднєсол предсидатель Дружтва Златко Манько, як и Финансийни звит и звит Надпатраюцого одбору.
На схадзки Скупштини констатоване же през роботу шейсц секцийох у прешлим року було надосц активносци, а окреме визначене же з роботу почала дзецинска драмска ґрупа.
Скупштина прилапела и звити о роботи секцийох, та плани роботи Дружтва и секцийох, як и финансийни план за 2017. рок.
За нового члена Управного одбору вибрани Мирослав Мохнацки, длугорочни член Старшей шпивацкей ґрупи КПД.