Отримана схадзка Управного одбору Дружтва за руски язик, литературу и културу

автор апа
937 Опатрене

НОВИ САД – На 17. схадзки Управного одбору Дружтва за руски язик, литературу и културу,  отриманей пияток 15. юния, у просторийох Завода за културу войводянских Руснацох у Новим Садзе, додзелєни Припознаня зоз меном „Славка Сабадош” предшколским дзецом и школяром и предстевни виданя Дружтва за 2017/2018. рок.

Секретар Дружтва, Ирина Папуґа, гварела же того року Припознанє зоз меном „Славка Сабадош”, хторе Дружтво додзелює од 2005. року за одлични успих на змаганьох у знаню мацеринского язика, достаню 24 найзаслуженєйши школяре зоз шицких наших местох.

У Новим Садзе наградзени предшколски дзеци: Аня Колбас, Филип Салонтаї и Алоша Сабадош; зоз основних школох: Даниєл Перкович и Каролина Гарди VIII класа и зоз штреднїх: Мая Медєши, Оливера Пап, Петар Хромиш, Алексей Кухар и Владимир Венчельовски школяре IV класох.

У Бачкей Тополї припознанє уж придате Боґларки Ґере зоз VII клас ОШ „Чаки Лайош”, а у Руским Керестуре припознаня достаню: Стефан Колошняї и Андрей Шайтош IVª и Алексей Мудри VIIIª и Павле Венчельовски VIIIb класа, а будзе додзелєне и припознанє зоз меном „Янко Олеяр” налєпшому школярови IV класи Гимназиї.

Потим рецензенти и авторе бешедовали о виданьох Дружтва и прешлим року: о Словнїку руского народного язика І и ІІ том автора др Юлияна Рамача, Зборнїку роботох Studia Ruthenica 22 у виданю Дружтва, о кнїжки „З червеним дописане” авторки мр Гелени Медєши, о кнїжки „Нє бац ше од живота” авторки Меланиї Арваї, о каталогу у фарбох „Стретнуца руских школох 2”.

Бешедоване и о штирох сликовнїцох за предшколски дзеци: Єшеньска розгварка, Хто цо роби, Домашнї животинї и У нашим краю птички шпиваю и о каталогу зоз подобовей колониї „Стретнуце у Боднарова”.

На схадзки гварене же Дружтво у периодзе медзи двома схадзками мало вельо активносци, отримани рижни сходи, манифестациї, означени рочнїци, стретнуца зоз шкоярами. У тей першей половки рока Дружтво призначело вецей як 50 таки активносци.

Кед слово о финансийох, на рахунку Дружтва у прешлим року було 725 540 динари, з хторих потрошени 712 408 динари, а то указує же на рахунку позитивни салдо, бо остало ище вецей як 13 000 динари, гварене на схадзки.

У тим року зоз рижних жридлох – членеринох, помоци, донацийох и буджету ше рахує на подобни средства, бо и тот рок як ше планує будзе богати. Планує ше отримац исте число акцийох и манифестацийох. Тиж так и видавательство Дружтва уж порихтало єдну кнїжка за друкованє, а пририхта ше ище штири. 

ПОВЯЗАНИ ТЕКСТИ