ВЕРБАС – Пияток у вербаским КПД „Карпати” отримана схадзка Управного одбору Рускей матки, хтору водзел предсидатель Матки Дюра Папуґа, а на нєй прилапени штири точки дньового шора.
Папуґа присутних поинформовал о участвованю делеґациї Рускей матки на дзешатим Медзинародним биєналу лемковскей/русинскей култури у Кринїци у Польскей, поднєсол звит зоз 4. зашеданя Шветовей ради Русинох/Руснацох/Лемкох и звит зоз зашеданя Комисиї за масмедиї и ґранти Шветового конґресу.
Звит зоз зашеданя Комисиї за историю поднєсол Борис Фейди хтори вибрани и за предсеидателя тей комисиї, а Дюра Папуґа членох Матки поинформовал и о резултатох по поднєшених приявох РМ на конкурси локалних самоуправох, покраїнских секретериятох и Министерства култури и информованя за 2018. рок.
На схадзки догваряне и о наступних активносцох месних/городского/реґионалного одбору Рускей матки у 2018. року, як цо то Стретнуце младих поетох, литературних и музичних творительох у Руским Керестуре, Подобова колония у Коцуре и медзинародни русински филмски фестивал „Русин филм фест” у Шидзе.