МИКЛОШЕВЦИ (ГОРВАТСКА) – Всоботу и внєдзелю, 25. и 26. авґуста, отримана 33. Културна манифестация „Миклошевци 2018”, у Миклошевцох у Републики Горватскей. У соботовей програми Руски културни центер (РКЦ) з Нового Саду отримал цаловечарши концерт.
Всоботу у просторийох основней школи отворена вистава вишивкох КУД „Яким Ґовля”, а потим поетско-музични вечар на хторим промовована кнїжка Агнетки Балатинац „Ґомбуля”, на хторей участвовали и члени Женскей шпивацкей ґрупи КУД „Яким Ґовля”.
Вечаршу програму означел цаловечарши концерт новосадского РКЦ-у котри ше публики у Миклошевцох представели зоз седем точками.
Концерт отворела фолклорна ґрупа „Ветеранки”, зоз хтору руководзи Миломир Шайтош, зоз танцом „Раковецкий кручений танєц”, а у програми одтанцовали и „Женски руски танци зоз Марамурешу” и на концу „Фляшков танєц”.
Хор „Гармония”, зоз хторим дириґує Сузана Ґрос-Маркович, одшпивал три шпиванки – „Били орґони”, „Мила моя” и „Розпрягайте хлопци конї”.
Младежска фолклорна ґрупа хторей руководителє Андреа Бики, Тамара Салаґ и Михаїл Римар виведла хореоґрафию „Стародавни танци зоз Шаришу”, а Хлопска шпивацка ґрупа з руководительом Борутом Павличом одшпивала шпиванки „Желєнєє жито”, „А я хлапец Капущан” и „А я себе порадзим”.
Фолклорни наступи провадзел оркестер РКЦ-у хторому руководитель Мирослав Пап. Вони одграли и два композициї – „Верба” и „Бабушка”.
На концу програми подпредсидатель Национално совиту Рускей националней меншини у Сербиї Йовґен Мудри подзековал домашнїхм на поволанки, а Славко Ждиняк, предсидатель КУД „Яким Ґовля” госцом уручел пригодни дарунки.
Внєдзелю, 26. авґуста, после покладаня венцох отримана Служба Божа, а дочекани и бициґлисти з Руского Керестура, а на смотри фолклору „Поздрав ровнїни”, наступели вецей културно-уметнїцки дружтва.
Тогорочна Манифестация „Миклошевци 2018” отримана под покровительством Совиту за национални меншини Републики Горватскей, Општини Томпоєвци и Союзу Руснацох Републики Горватскей.