ВЕРБАС – У велькей сали Културно-просвитного дружтва (КПД) „Карпати” у Вербаше всоботу, 20. мая, отримани Седми Хорски фестивал „Карпати”.
Численим нащивительом манифестациї ше перше представели нашо хори – домашнї Мишани хор КПД „Карпати”, под дириґентством Надїї Воротняк, Хор грекокатолїцкей церкви св. апостолох Петра и Павла и Руского културного центру „Гармония” з Нового Саду, под дириґенством Весни Кесич Крсманович, Мишани хор Дому култури и Катедралней церкви св. о. Миколая з Руского Керестура, под дириґентством Лидиї Пашо и Хор „Розанов“ з Дюрдьова, под дириґентством Татяни Барна.
Госци на Фестивалє були Хор „Бачки шпиваче” з Вербасу, з хторим дириґовала, Єлена Алексич и Хор єврейскей општини „Хашира” з Нового Саду, под дириґентством Весни Кесич Крсманович.
Тогорочни Фестивал бул домашнї и госцом з иножемства – оркестру бандуристох Києвского институту музики и Инструменталному ансамблу „Високи замок“, хтори творя професийни музичаре з Львовскей филгармониї. Госци у Сербиї пребуваю на „Дньох України“ у Новим Садзе.
Публика з моцнима аплаузами привитала квалитетни наступи шицких хорох, а окреме уживала у наступу госцох з України, котрих поволала и на бис. После манифестациї, у веселей и приємней атмосфери за учашнїкох и госцох Фестивалу орґанизоване дружене у Центре за физичну културу „Драґо Йовович”.
Учашнїкох и госцох на Хорским фестивалє „Карпати” привитал предсидатель Националного совиту Руснацох Славко Рац, а програму провадзели и народни посланїци Олена Папуґа и Марияна Мараш, котра и предсидателька Скупштини општини Вербас, помоцнїк покраїнского секретара за привреду Серґей Тамаш и член Општинскей ради Вербас задлужени за културу Боян Периз, старовербаски парох о. Алексий Гудак, як и рускокерестурски парох о. Михайло Малацко и дюрдьовски капелан о. Михаил Холошняй, котри и шпивали у хорох.
Програму провадзели и редакторе и новинаре руских редакцийох Радио Нового Саду, Радио-телевизиї Войводина и НВУ „Руске слово“.
Тогорочни Фестивал отримани з финансийнима почежкосцами, алє финансийну потримовку орґанизаторови – КПД „Карпати” – обецали Национални совит Руснацох, Општина Вербас, Покраїнски секретарият за културу, явне информованє и одношеня з вирскима заєднїцами и Покраїнски секретерият за образованє, предписаня, управу и национални меншини-национални заєднїци.