ВЕРБАС – Всоботу, 22. децембра, у вербаским КПД „Карпати” отримана заєднїцка схадзка Управного одбору Рускей матки и Редакцийного одбору глашнїка Рускей матки „Руснак”.
На Дньовим шоре розпатрани предкладаня за вибор и менованє членох Одбора за образованє, Одбора за културу, Одбора за информованє и Одбора за урядове хаснованє язика и писма у Националним совиту (НС) Руснацох, спред виберанковей лїстини „Млади маю першенство” и Рускей матки.
До Одбору за културу предложена Саня Тиркайло зоз Шиду, до Одбору за информованє предложени Дюра Папуґа з Руского Керестура, до Одбору за образованє Ксения Медєши зоз Коцура, и до Одбору за урядове хаснованє язика и писма предложена Мария Дорошки.
На схадзки була и догварка о наступних активносцох месних/городского/реґионалного одбору Рускей матки и Редакцийного одбору глашнїка Рускей матки „Руснак”.
Так, 29. децембра у Месним одборе Рускей матки у Руским Керестуре будзе приказани бавени филм Стоваришеня Лемкох Акция „Висла”, друга часц, у режиї Андрия Копчу, а у фебруару 2019. року тот филм будзе приказани и у КПД „Дюра Киш” у Шиду и Историйским архиву „Срим” у Сримскей Митровици.
Єден з планох и тематска Скупштина Рускей матки, хтора би мала буц у другей половки януара, а тема будзе о одборох Националного совиту Руснацох, як и роботи НС у цалосци. Попри тим, за другу половку фебруара планує ше порядну Рочну скупштину Матки.
На схадзки промововане и нове число часопису „Руснак” и додатку о Стретнуцу поетох, а по законченю урядовей часци, и у просторийох КПД „Карпати” приказана друга часц бавеного филма Стоваришеня Лемкох Акция „Висла”.
