Оформена делеґация РМ за Штернасти Шветови конґрес РРЛ

автор мар
1.1k Опатрене

РУСКИ КЕРЕСТУР – На вчерайшей схадзки Управного одбору (УО) Рускей матки (РМ) у Руским Керестуре винєшени звити резултатох конкурованя Матки з проєктами на конкурси ресорних покраїнских секретариятох, так же за одход на Штернасти Шветови конґрес Русинох/Руснацох/Лемкох (РРЛ) од Покраїнского секретарияту за образованє предписаня, управу и национални мешини-национални заєднїци РМ достали 56 000 динари, а за порядну дїялносц 154 000 динари, за яки виноси и конкуроване.

На конкурсу Покраїнского секретарияту за културу, явне информованє и одношеня з вирскима заєднїцами за Други Медзинародни филмски фестивал „Русин Филм Фест” у Шидзе РМ достала 11 000, а исту суму и за отримованє тогорочней Подобовей колониї у Коцуре, цо, як поведзене, менєй од вимаганого за тоти проєкти.

На схадзки УО вчера одредзени и делеґациї РМ за участвованє на Штернастим Шветовим конґресу РРЛ, хтори од 29. юния по 2. юлияй будзе у Осиєку, у Републики Горватскей, як и за Осми Шветови форум русинскей младежи, хтори у исти час тиж будзе у Осиєку.

Делеґати РМ на Конґресу буду Дюра Папуґа, Ксения Медєши, Миломир Шайтош, Юлиян Лазор, Владимир Бучко, Аранка Медєши, Наташа Макаї Мудрох, Моника Гарди, Мария Дорошки и Владимир Джуня, а госци РМ на Конґресу буду Владо Няради, Деян Загорянски, Саня Тиркайло, Славко Пап и Давор Сабо.

За делґатох на Шветовим форуму русинскей младежи спред Форуму младих РМ предложени Борис Фейди, Стеван Самочета, Себастиян Няради и Любомир Медєши, медзитим, понеже предсидатель Форуму младих РМ Борис Фейди нє присуствовал на вчерайшей схадзки, тота одлука нє конєчна.

По законченю схадзки членом УО представене припознанє хторе РМ достала од „Сербскей коруни” Културно-историйного центру з Краґуєвцу, за граждански заслуги у винїмковим доприношеню култури.

 

 

ПОВЯЗАНИ ТЕКСТИ