РУСКИ КЕРЕСТУР – Криж хтори ше находзи у центре валала опрез порти Катедралней церкви св. оца Миколая, 31. октобра очисцени и ошвижени, а на приватну инициятиву власнїка керестурского подприємства „Каменорезац Малацко”, Владимира Малацка.
Шицки роботи и окончел Малацко зоз своїма роботнїками, а по його вияви за Рутенпрес, очисцени є од моховини – камене постолє крижа и сам бетонски криж, камень пребрушени и премасцени з одвитуюцима средствами, як и сам криж хтори пред тим и офарбени.
Як познате, тот криж по конєц Другей шветовей войни стал на штред крижней драги у центре валала, дзе є поставени 1902. року як дарунок Михала Шимка и його супруги. Першираз го пред даскельо роками тиж самоинициятивно обновел „Каменорезац Малацко”.
