О бавискох, кед о хлєбу нєт (вецей) цо повесц

автор мирон джуня
922 Опатрене

Харизма сримского боку Нового Саду ше повторює: после спонтаного феномену воланого Еґзит (тиж народзеного з бачкого боку Дунаю, давного 2000. року), вимесцованє „Gradić-fest”-у до Петроварадину, указує свойо ефекти у полним розмаху у одношеню на лоньску праксу. Як иншак розтолковац удатносц манифестациї Фестивала улїчних гудацох котри у континуитету уж седемнасти раз тирва кажди рок у Новим Садзе, а котри того року як ношаца манифестация „Gradić-Fest”-у, успишно позберал вецей културни подїї до своєй орбити и обєдинєно их представел заинтересованей явносци перши три днї септембра.

Вшелїяк же заслугу у тим шицким треба приписац насампредз тиму позбераному коло аґилней вивершней директорки Натали Белянски, котри звонка политичних калкулацийох (читай: буджетних редукцийох, лєбо манипулацийох – КЦ НС, Стерийово позорє…) яки у остатнї час компликую отримованє и дїялносц велїх, та и примарних културних манифестацийох и институцийох у общедружтвеним рамику, посцигли винїмкови консензус злучуюци датумски и на истим локалитету одбуванє вецей подїйох котри наставали у варошу остатнїх рокох, як наприклад „Синема сити”, най спомнєм голєм даєдну викричаншу, а требало би их ту чишлїц ище надосц…

Могло би ше у пракси виглєдовацкого новинарства тераз пробовац вартац яки модел применєни за реализацию такей єдней зложеней подїї у ище зложеншей ситуациї медзи пануюцу городску (и державну) политичну номенклатуру, наспрам приблїжованя прокламованей титули Нового Саду як пристолного европского варошу култури о даскельо роки, алє верим же нагоди и часу за евалуацию (и) о тей теми ещи будзе.

Обсяг статї нє дошлєбодзує акцентованє ище дзепоєдних детальох коло самого ивенту, а (бридкей) хвилї (другого и трецого дня) як такей нє фазон давац увагу. Наглашиц бим лєм замеркованє єдней учаснїци до чийого суду верим, медзи иншим и пре вецейрочну праксу на плану тих файтох збуваньох: Ґенерални упечаток же ше паралелне мултикултурне крижанє того типу нє зошлїсло до вашарского карактеру, котри нєридко грожи деґрадовац таки подняца. Напроцив – андерґраунд, чи аванґарда, з тей нагоди ше цалком удатно представел такв. мейнстриму, односно, варош достал (попри Еґзиту) ище єдну подїю по котрей годзен достац широки публицитет по сучасних общих мерадлох, зоз чим ше може цешиц крачаюци вочи вигласаней титули за 2021. рок. Обашка, (ч)и усприч зложеней и проблематичней общедружтвеней ситуациї.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ