БЕОҐРАД – Представителє репрезентативних синдикатох согласни же би од идуцого року минимална цена роботней годзини була звекшана зоз 130 на 154 динари, гварел за Бету предсидатель Зєдинєних синдикатох ,,Нєзависносц” Зоран Стоїлькович.
– Услов Униї роботодавательох же би була звекшана нєопорцийована часц заробку, хтора тераз 11 600 динари. О тим нам ище нє познате становиско Министерства финансийох – наглашел Стоїлькови
Уния роботодавательох Сербиї вимага же би звекшанє минималней цени роботи нє було обтерховане з порцийнима даванями.
– Прилапиме кажде звекшанє минималного заробку, чи то 140 динари на годзину, кельо предклада Влада, лєбо 154, цо вимагаю синдикати, бо и то лєпше ришенє од нєучаствованя у догваркох, же бизме вец нє мушели прилапиц наруцене ришенє Влади – гварел предсидатель Униї роботодавательох Небойша Атанацкович.
Вон додал же праве за нєшка заказна схадзка Социялно-економского совиту Сербиї на хторей би мала буц посцигнута догварка шицких трох бокох о звекшаню минималцу.
Минимална цена роботней годзини од януара того року звекшана зоз 121 на 130 динари, а за остатнї пейц роки є звекшана за 15 динари.
Минимални заробок од 22 800 динари у Сербиї примаю коло 350 000 роботнїки.