РУСКИ КЕРЕСТУР – Роботи на реконструкциї центру у Руским Керестуре, дзе парк достанє нови випатрунок зоз бехатон коцками, а будзе ушорени и простор дзе прешлого року спилєни смарґльово баґрени, почали пияток 15. юния. Роботи окончує подприємство „Еко ґрадня” зоз Зренянину, а їх законченє наявене за 30 днї.
Зоз буджету Општини Кула за 2018. рок за тоту намену опредзелєни 5 милиони 302 тисячи 867 динари, а виробок проєкту финансовала Месна заєднїца Руски Керестур пред двома роками зоз 360 000 динари, дознаваме од предсидателя Совиту Месней заєднїци Руски Керестур Владимира Олеяра.
– Остатня реконструкция центру була пред 23-ома роками, тераз заплановане бетонски дражки заменїц зоз бехатон коцками, древа зоз парку нє буду винїмани, окрем двох старих торґуньох при Майсторским доме. Буду виняти и пняки смарґльових баґренох, дзе потим буду направени нови места за паркиранє автох – толкує Олеяр, та наглашує же до рускокерестурского парку нє буду поставяни бехатон коцки зоз кулскей Крамеровей улїци, и же виводзач роботох цалком други.
Зоз проєктом предвидзене и цалосне менянє ошвиценя у парку, дзе на место терашнїх кандалаберох буду поставяни нови зоз лед ошвиценьом. Кед будзе потреби буду додати и нови древа, а на концу роботох будзе окончена и реконструкция постояцих лавочкох у парку.