РУСКИ КЕРЕСТУР – После спознаня же за 16. юний того року у Привредним судзе у Зомборе заказана розправа о гласаню за нови план реорґанизациї рускокерестурскей фабрики „АБЦ фуд”, по хторим предложене же ше длуство паприґаром, у першим и ище важацим планє реорґанизациї уж зменшане за 40 одсто, тераз зменша за 60 одсто, Здруженє паприґарох збера подписи процив предложеного плану.
Свойо подписи процив прилапйованя нового предложеного плану реорґанизациї паприґаре, роботнїки и други поєдинци и фирми котрим „АБЦ фуд” длужна по актуалним планє реорґанизациї, можу дац ище нєшка од 20 до 22 годзин у просторийох Здруженя паприґарох у Спортскей гали.
Подписи процив плану реорґанизациї до Привредного суду у Зомборе буду придати на ютре, покля и термин за придаванє пригваркох на план. Паприґаре пре тото анґажовали и адвоката, а як дознава Рутенпрес, у цо векшим чишлє планую пойсц и на розправу до Зомбора.
Привредни суд у Зомборе ище 28. априла принєсол Ришенє за „порушованє предходного поступку за випитованє условийох за отверанє предликвидацийного поступку з напредок пририхтаним планом реорґанизациї над предликвидацийним длужнїком „АБЦ фуд” з Руского Керестура”, о чим, як за Рутенпрес гварела предсидателька Здруженя паприґарох Душица Орос, дознали аж початком того тижня.
На основи спомнутого ришеня, судска розправа за одлучованє о предлогу и гласанє о плану реорґанизациї заказана за 16. юний на 12 годзин у Привредним судзе у Зомборе.
По актуалним планє реорґанизациї, хтори принєшени самим концом 2013. року, длуство за придату паприґу и по других основох ткв. „нєобезбедзених поверительох” було зменшане за 40 одсто, цо вони и прилапели, а з тим и тедишнє цалосне длуство Фабрики було зменшане за прейґ 3 милиони 100 000 еври.
