РУСКИ КЕРЕСТУР ‒ Паприґарски бал, у орґанизациї Здруженя паприґрох ,,Капсикум анум”, традицийни, тринасти по шоре, отримани соботу вечар у ресторану ,,Червена ружа”, а на нїм ше вешелєли паприґаре з Керестура и їх госци з Коцура, Лалитю, Вербасу, Кули и иножемства.
Тот бал характеризую напредок заручени места ище прешлого року, богата томбола котру обезпечує Орґанизацийни одбор и спонзоре, франтовлїви бависка за найшмелших, весела музика и танєц аж до ранших годзинох.
Велї награди на томболи були праве за паприґарох и парастох вообще, та як и по тераз госци на балу могли достац рижни землєдїлски услуги, хемийни средства, нашеня, дарунки од осиґуруюцих хижох и банкох, моторчок за залїванє, путованє до Мадярскей, тапетарски продукти и полно други награди.
Перша награда була єдна тона штучного гною, друга ґарнитура за шедзенє за вонка, треца бул телевизор, а шицки три достали госци з валалу.
Госцох по перши раз забавял коцурски бенд ,,Коцурски бетяре”, а на репертоару були преважно сербски шпиванки.